მომსახურების პირობები

01რა არის სერვისი

INI Sign არის ელექტრონული ხელმოწერის პლატფორმა. ის იძლევა დოკუმენტის ატვირთვის, ხელმოსაწერად გაგზავნის, ხელმომწერის დადასტურებისა და ხელმოწერის მტკიცებულების უცვლელ არქივში შენახვის შესაძლებლობას.

სერვისს უზრუნველყოფს შპს „ინი ჯგუფი“ (ს/კ 000000000), მისამართი: თბილისი, საქართველო. კონტაქტი: support@ini.ge.

ჩვენ ვართ ტექნიკური სერვისის მიმწოდებელი. ჩვენ არ ვართ თქვენსა და თქვენს კონტრაგენტს შორის დადებული დოკუმენტის მხარე, არ ვამოწმებთ დოკუმენტის შინაარსს და არ ვიძლევით იურიდიულ კონსულტაციას.

02ანგარიში და წვდომა

ანგარიშს ქმნის იურიდიული პირი და თავად განსაზღვრავს მომხმარებელთა რაოდენობას პაკეტის ლიმიტის ფარგლებში. ხელმომწერს ანგარიში არ სჭირდება.

თქვენ იღებთ პასუხისმგებლობას ანგარიშზე მითითებული მონაცემების სისწორეზე, წვდომის მონაცემების დაცვასა და თქვენი ანგარიშიდან განხორციელებულ ყველა მოქმედებაზე.

აკრძალულია სერვისის გამოყენება კანონსაწინააღმდეგო მიზნით, სხვისი სახელით ხელმოწერისთვის, არასასურველი შეტყობინებების დაგზავნისთვის ან სისტემის მუშაობის ხელოვნური გადატვირთვისთვის.

03ხელმოწერის იურიდიული ძალა

ხელმოწერის პროცესში ხელმომწერი ადასტურებს თანხმობას იმის თაობაზე, რომ მისი ელექტრონული ხელმოწერა პირადი ხელმოწერის ტოლფასია. თანხმობის ტექსტი და მისი ვერსია ინახება მტკიცებულების ჩანაწერში.

დასრულებულ დოკუმენტს სისტემა უანგარიშებს უნიკალურ კოდს (SHA-256) და ხელმოწერის ყველა გარემოებას უცვლელ არქივში წერს — ეს ადასტურებს დოკუმენტის მთლიანობას. ხელმომწერის იდენტიფიკაცია ხდება არჩეული მეთოდით — SMS-კოდით ან ელფოსტით. კვალიფიციური ელექტრონული ბეჭედი და ID-ბარათით ხელმოწერა სერვისის მომდევნო ეტაპია და ამჟამად არ გამოიყენება.

თქვენ პასუხისმგებელი ხართ იმის შემოწმებაზე, რომ კონკრეტული ტიპის დოკუმენტისთვის კანონმდებლობა ელექტრონულ ფორმას უშვებს. სერვისი არ გამოიყენება იმ გარიგებებისთვის, რომლებსაც კანონით სავალდებულო სანოტარო ან სხვა განსაკუთრებული ფორმა აქვს.

04ფასი და გადახდა

ყველა ფასი მითითებულია ლარში, დღგ-ის ჩათვლით. გამოწერა თვიურია და ავტომატურად განახლდება, სანამ არ გააუქმებთ.

პაკეტი მოიცავს მითითებულ ლიმიტებს მომხმარებელთა რაოდენობაზე, SMS-ებზე, ელფოსტით გაგზავნასა და სივრცეზე. ლიმიტის ამოწურვის შემდეგ შესაბამისი ფუნქცია ჩერდება, სანამ არ შეიძენთ დამატებით პაკეტს ან არ დაიწყება ახალი საანგარიშო პერიოდი.

ფასის ცვლილების შესახებ გაცნობებთ არანაკლებ 30 დღით ადრე. უკვე გადახდილი პერიოდის ფასი არ იცვლება. გამოწერის შუა პერიოდში გაუქმებისას გადახდილი თანხა არ ბრუნდება, სერვისი კი ხელმისაწვდომია პერიოდის ბოლომდე.

05შენახვა და არქივი

ხელმოწერილი დოკუმენტები ინახება თქვენს ანგარიშზე პაკეტით განსაზღვრული სივრცის ფარგლებში. თქვენ ნებისმიერ დროს შეგიძლიათ მათი ჩამოტვირთვა და წაშლა.

დოკუმენტის წაშლის შემდეგაც ჩვენთან რჩება ხელმოწერის მტკიცებულების ჩანაწერი — დოკუმენტის კოდი და ხელმოწერის გარემოებები. ის ინახება უცვლელ (WORM) არქივში 10 წელი და მისი შეცვლა ან წაშლა ტექნიკურად შეუძლებელია, მათ შორის ჩვენთვის.

ეს ვადა განპირობებულია სამოქალაქო კოდექსით დადგენილი ხანდაზმულობის ვადებითა და მხარეთა კანონიერი ინტერესით, დაიცვან საკუთარი უფლებები შესაძლო დავისას.

06პასუხისმგებლობა და შეწყვეტა

სერვისი მიეწოდება არსებული სახით. ჩვენ ვიღებთ გონივრულ ზომებს უწყვეტი მუშაობისთვის, მაგრამ არ ვიძლევით გარანტიას, რომ სერვისი იმუშავებს შეფერხების გარეშე.

ჩვენი პასუხისმგებლობა ნებისმიერ შემთხვევაში შემოიფარგლება ბოლო სამი თვის განმავლობაში თქვენ მიერ ფაქტობრივად გადახდილი თანხით. ჩვენ არ ვაგებთ პასუხს არაპირდაპირ ზიანზე, მიუღებელ შემოსავალზე ან თქვენი კონტრაგენტის ქმედებაზე.

თქვენ შეგიძლიათ გამოწერის გაუქმება ნებისმიერ დროს. ჩვენ შეგვიძლია სერვისის შეჩერება, თუ დარღვეულია ეს პირობები ან გადახდა ვადაგადაცილებულია 30 დღეზე მეტი ხნით — წინასწარი შეტყობინებით.

ეს პირობები რეგულირდება საქართველოს კანონმდებლობით. დავა, რომელიც მოლაპარაკებით ვერ გადაწყდება, განიხილება თბილისის სასამართლოში.

07გადახდა, შეჩერება და ანგარიშის გაუქმება

ფასიანი პაკეტი იკვეთება კაბინეტიდან. შეკვეთისთანავე გამოიწერება ინვოისი კომპანიის საიდენტიფიკაციო კოდზე; გადახდის ვადა გამოწერიდან 7 კალენდარული დღეა. პაკეტი აქტიურდება მაშინ, როცა თანხა ჩვენს ანგარიშზე აისახება — გადახდას სისტემა ავტომატურად ადასტურებს ბანკის ამონაწერიდან.

თუ ინვოისი გადახდის ვადაში არ დაიფარა, სერვისი ავტომატურად ჩერდება: ახალი დოკუმენტის დამატება და გაგზავნა შეუძლებელი ხდება. უკვე ხელმოწერილი დოკუმენტები და მტკიცებულებები ხელმისაწვდომი რჩება.

შეჩერების ნებისმიერ მომენტში შესაძლებელია უფასო პაკეტზე გადასვლა — ის დაუყოვნებლივ აღადგენს სერვისს უფასო პაკეტის ლიმიტებში, ხოლო გადაუხდელი ინვოისი უქმდება.

თუ შეჩერებიდან 30 კალენდარულ დღეში ანგარიში არც გადაიხდის და არც უფასო პაკეტზე გადავა, ანგარიში ავტომატურად უქმდება. გაუქმებული ანგარიში ემატება წაშლის რიგში იმავე პირობებით, რაც ხელით წაშლაზეა (30 დღე მონაცემების სრულ წაშლამდე); ხელმოწერილი დოკუმენტების მტკიცებულება კანონით 10 წელი ინახება ცალკე, უცვლელ საცავში.

უფასო პაკეტი არ ჩერდება და არ უქმდება გადაუხდელობის გამო — მას ინვოისი არ აქვს.